THE HAGUE, NETHERLANDS — Gipanalipdan ni Bise Presidente Sara Duterte ang iyang amahan nga si kanhi Presidente Rodrigo Duterte pinaagi sa pagpahayag nga ang War on Drugs usa ka patakaran sa gobyerno ug dili crime against humanity.
Atol sa usa ka rally sa The Hague, Netherlands, gipadayag ni VP Sara nga ang kampanya batok sa iligal nga droga—sama sa “Oplan Tokhang”—kabahin sa zero-tolerance policy ug pagdumala sa pamunoan, maayo man o daotan ang naggawas nga resulta.
Gikuwestiyon usab sa Bise Presidente ang mga ebidensya sa International Criminal Court (ICC), diin iyang gipunting nga dili tanang natala nga pagpamatay resulta sa opisyal nga operasyon sa kapulisan tungod kay aduna usab mga ordinaryong krimen nga nahitabo sa nasod.
Gipasabot dugang ni VP Sara nga kon aduna man ugaling nahitabong abuso o sayop sa pagpatuman sa maong patakaran, ang lokal nga mga hukmanan sa Pilipinas ug dili ang langyaw nga korte ang adunay hurisdiksyon nga modungog sa maong mga kaso.