Gikuwestiyon ni Senador Rodante Marcoleta ang gikaingong paglangan sa Office of the Ombudsman sa pag-aksyon sa kaso batok kang kanhi House Speaker Ferdinand Martin Romualdez may kalabotan sa anomalya sa flood control projects.
Matud ni Marcoleta, Abril pa niining tuiga nadawat sa Ombudsman ang complaint affidavit batok kang Romualdez, hinungdan nga iyang gipangutana kon ngano nga wala pa kini mahatagag aksyon kumpara sa ubang mga kaso nga dali rang naisaka sa Sandiganbayan.
Dugang pa sa senador, gipahayag usab ni Presidente Ferdinand Marcos Jr. sa iyang miaging State of the Nation Address (SONA) nga padulong na ang pagpasaka og kaso batok sa kanhing Speaker ug kinahanglang mabawi ang mga pondo gikan sa korapsyon aron maibalik sa lungsod.
Samtang sa pikas bahin, nagpahayag gihapon og pagsalig si Senador Erwin Tulfo sa Office of the Ombudsman sa padayon niining paggukod sa mga indibidwal nga nalambigit sa anomalya ug korapsyon.