Gikatakdang mosalmot sa European Championships sa sunod nga bulan ang Swedish pole vault sensation nga si Armand “Mondo” Duplantis human makarekober sa injury nga maoy hinungdan sa iyang pag-atras sa miaging torneyo.
Gipadayag sa iyang ahente nga si Daniel Wessfeldt nga andam na usab ang 26-anyos nga atleta sa kompetisyon, human kini naangol sa wala nga paa atol sa iyang paglukso og 5.95 metros sa Diamond League sa London niadtong miaging semana.
Matud ni Wessfeldt, hingpit nang nawala ang kasakit nga gibati ni Duplantis ug wala na’y kabalak-an bahin sa iyang kondisyon sa dili pa ang maong torneyo.
Si Duplantis, nga duha ka higayon nang Olympic champion ug tulo ka higayon nga world champion, nakapahimutang na og 15 ka world records sa pole vault.
Ang iyang unang world record mao ang 6.17 metros niadtong 2020, samtang ang pinakabag-o niyang rekord nga 6.31 metros iyang nahimo sa Sweden niadtong Marso.
Pagahimuon ang European Championships sa Birmingham, England, gikan Agosto 10 hangtod 16.