Naangol ang tulo ka tawo human nagbangga ang duha ka motorsiklo sa National Highway sa Barangay 1-D, Poblacion, Quezon, Bukidnon, takna alas 9:40 sa buntag karong adlawa, Hulyo 22.
Base sa inisyal nga imbestigasyon sa Quezon Municipal Police Station, nagbangga ang usa ka Yamaha Mio Gravis ug Euro Marvel 125 dihang mitabok sa karsada ang usa sa mga motorsiklo duol sa pedestrian lane. Gituohang kusog ang dagan sa pikas motorsiklo ug wala na kini makalikay, maong nahitabo ang kusog nga bangga.
Naangol ang duha ka drayber ug usa ka back rider. Duha sa mga biktima gidala sa Bukidnon Provincial Hospital sa Maramag alang sa pagtambal, samtang ang usa gidala sa Quezon Health Center Infirmary.
Gibutyag usab sa kapulisan nga ang drayber sa usa sa mga motorsiklo walay balidong driver’s license sa dihang nahitabo ang aksidente.
Padayon pa ang imbestigasyon sa kapulisan aron matino ang tukmang hinungdan sa aksidente ug ang kantidad sa kadaot sa duha ka motorsiklo.