Gamiton ni Miss Philippines Earth 2026 Rina Andrea Reyes Delos Santos ang iyang titulo aron ipasiugda ang pagpanalipod sa kinaiyahan ug malungtarong turismo sa lalawigan sa Cagayan.
Gikan sa iyang kasinatian isip usa ka trained community tour guide, nahimong pundasyon sa iyang adbokasiya ang environmental protection ug sustainable tourism nga iyang ipadayon pinaagi sa iyang korona.
Matud ni Delos Santos, gamiton niya ang iyang plataporma aron ipaila sa mas daghang tawo ang kultura, tradisyon, ug mga natural nga bahandi sa Cagayan.
Iyang giingon nga dako ang iyang kalipay human mahimong unang representante sa Cagayan nga nakadaog sa prestihiyosong kompetisyon.
Matud niini, mas nabati niya ang kalampusan tungod sa suporta ug garbo nga gipakita sa mga Cagayano. Sa iyang pagbalik sa probinsya, mainiton siyang giabiabi pinaagi sa usa ka grand homecoming parade.
Sunod niyang tumong ang pag-apil sa mga environmental programs ug pagpalig-on sa turismo sa Cagayan.