Nahimong dakong kabalaka sa mga residente sa Hengzhou City sa Guangxi Region sa China ang naghitak sa gatusan ka mga halas human sa grabeng pagbaha nga gidala sa Bagyong Maysak.
Base sa mga taho sa state media, gibanabana nga kapin sa 900 ka mga halas, lakip ang mga makahilong cobra, ang nakagawas gikan sa mga snake breeding farms nga nalapawan sa baha.
Usa ka babaye ang namatay human sa gituohang napaakan sa cobra, samtang adunay ubang mga residente nga gitaho usab nga napaakan.
Mikaylap sa social media ang mga bidyo nga nagpakita sa mga halas nga naglangoy sa mga kalsada ug kabalayan nga nalumos sa baha, nga maoy nakahatag og dakong kahadlok sa mga lumulupyo sa maong siyudad.
Tungod niini, nagpagawas og pasidaan ang mga awtoridad ug nag-awhag sa publiko nga maglikay sa mga lugar nga adunay taas nga sagbot ug sa mga lugar nga apektado sa baha, diin posibleng motago ang mga halas.
Gipalig-on usab sa lokal nga kagamhanan ang operasyon sa mga grupo nga gitahasan sa pagdakop sa mga halas ug gisiguro nga adunay igo nga suplay sa antivenom sa mga ospital aron maandam sa posibleng pagdagsa sa mga biktima sa paak sa halas.