Gibutyag sa Armed Forces of the Philippines (AFP) nga dili lamang usa ka yano nga opinyon sa akademiko ang migawas nga naratibo nga giangkon kuno sa Tsina ang Batanes.
Sa eksklusibong pakighinabi sa Bombo Radyo, sumala ni Rear Admiral Roy Vincent Trinidad, Special Spokesperson sa AFP alang sa West Philippine Sea, nga ang maong naratibo konektado sa mga lihok sa Chinese Communist Party ug susama sa pamaagi nga gigamit sa pag-angkon sa pipila ka teritoryo sa West Philippine Sea.
Matod ni Trinidad, importante nga masabtan sa katawhang Pilipino ang maong mga pamahayag ug magpabiling alerto batok sa mga sayop nga impormasyon may kalabotan sa teritoryo sa nasud.
Gipasabot usab ni Trinidad nga ang pagpalapad sa maong mga naratibo mahimong unang lakang sa mas dagkong impluwensya o pag-angkon sa laing nasud, busa gidasig niya ang publiko nga makigbahin sa pagdepensa sa kamatuoran ug soberanya sa Pilipinas.