Gipasalig sa Malacañang nga nagpadayon gihapon ang pagpangita sa gobyerno kang kanhing kongresista Zaldy Co, bisan pa og gi-archive sa Sandiganbayan ang graft case batok kaniya human wala siya madakpi sulod sa kapin unom ka bulan.
Matod ni Palace Press Officer Undersecretary Claire Castro, wala biya-i sa mga awtoridad ang ilang katungdanan sa pagpangita kang Co, nga giatubang sa mga kasong graft ug malversation may kalabotan sa giingong maanomalyang road dike project sa Naujan, Oriental Mindoro.
Gipasabot usab ni Castro nga ang pag-archive sa kaso usa lamang ka procedural nga lakang ug wala kini nagpasabot nga gibasura na ang mga kasong gisang-at batok sa kanhing mambabalaod.
Matod niya, ibalik dayon sa regular nga proseso ang kaso sa higayon nga madakpan si Co.
Dugang pa ni Castro, mihunong usab ang dagan sa prescriptive period samtang naka-archive ang kaso, busa dili mawagtang ang iyang posibleng pananagutan bisan pa og dugay siyang magpabilin sa gawas sa nasud.
Kahinumdoman nga si Co mibiya sa Pilipinas niadtong Hulyo 2025 alang sa medical treatment ug gialkansiyahan og warrant of arrest sa Nobyembre 2025.
Sa ulahi, gikumpirma sa Malacañang nga wala na siya sa kustodiya sa Czech Republic ug naghain na og aplikasyon alang sa political asylum sa France.