Nag-viral sa social media ang duha ka lalaki sa Indonesia human sila madakpan sa mga residente atol sa giingong pagsulay og pagpangawat sa usa ka establisemento.
Imbis nga gapuson lang samtang gihulat ang pag-abot sa kapulisan, giputos sila sa mga lumulupyo og orange nga adhesive tape gikan ulo hangtod tiil aron dili makalihok.
Mas nakadani pa sa atensyon ang usa sa mga suspek nga gibutangan pa og murag antena sa ulo, hinungdan nga gitandi sa daghang netizen sa karakter sa sikat nga children’s show nga Teletubbies.
Tungod niini, paspas nga mikaylap ang video sa internet ug nagbahin sa opinyon sa publiko.
Adunay nangatawa sa nahitabo, apan adunay usab nag-ingon nga posibleng nilapas na kini sa angayng pagtratar sa mga nadakpan ug mahimong usa ka porma sa vigilante justice.
Sa ulahi, gitugyan gihapon sa mga residente ang duha ka suspek ngadto sa mga awtoridad aron atubangon ang hustong legal nga proseso.