Andam na ang Gilas Pilipinas sa usa ka malisod nga tahas sa ilang pakigsangka batok sa New Zealand para sa 2027 FIBA World Cup Asian Qualifiers karong Hulyo 3 didto sa Auckland. Tinguha sa pambansang team nga makabawi gikan sa ilang sikit nga kapildihan, 66-69, batok sa Tall Blacks niadtong Pebrero didto sa Manila.
Bisan og dulaon kini sa gawas sa nasod, malaumon gihapon ang Gilas star nga si Dwight Ramos nga makakuha sila og “virtual home-court advantage” tungod sa dako nga komunidad sa mga Pilipino didto. Sumala kaniya, sa miaging higayon nga nidula sila sa New Zealand, halos tibuok crowd gilangkuban og mga Pinoy hinungdan nga morag anaa ra gihapon sila nagdula sa Pilipinas.
Bitbit usab sa Gilas ang nindot nga momentum human nila gipangpildi ang mga local clubs didto nga Manawatu Jets ug Franklin Bulls sa ilang mga gihimong tune-up games. Sa pagkakaron, ang Gilas ug New Zealand nagtabla sa ikaduhang dapit sa Group A nga duna’y 2-2 nga baraha. Human sa ilang dula karong Biyernes sa alas 3 sa hapon, molupad dayon ang Gilas paingon sa Australia aron sangkaon ang Boomers karong Hulyo 6.