Nagpasidaan ang United Nations (UN) nga ang nagpadayong outbreak sa makamatay nga Ebola virus sa Africa posibleng magdala og danyos nga moabot ngadto sa $3.6 bilyon sa ekonomiya sa maong kontinente ug makawagtang sa gatusan ka libo nga mga trabaho.
Sumala sa taho sa United Nations Development Programme (UNDP), ang maong krisis sa panglawas dako og posibilidad nga mosangpot ngadto sa usa ka grabe nga development crisis. Gawas sa paghagsa sa ekonomiya, mamahimo usab nga magtukmod kini sa hapit usa ka milyon ka mga tawo (gibana-banang 985,000 ka indibidwal) ngadto sa grabeng kakabos, diin ang mga kababayen-an maoy labing maapektuhan.
Nasayran nga sukad gideklara ang maong epidemya niadtong Mayo 15, kini nga partikular nga Bundibugyo strain sa Ebola—nga sa pagkakaron wala pa’y nasulayan nga lisensyadong bakuna o opisyal nga tambal—mitala na og 1,307 ka mga kaso ug napatay ang 377 ka mga tawo didto sa Democratic Republic of Congo (DRC). Duna na sab mga ginagmay nga kaso nga natala sa Uganda, samtang nabalaka ang mga eksperto nga posibleng mokatap pa kini sa mga kasilinganang nasod sama sa South Sudan, Rwanda, ug Angola kung dili dinalian nga mapundohan ang mga containment measures o lakang sa pagpahunong sa virus.