Gikagubtan karon sa social media ug sa mga mahiligon og tam-is ang usa ka pambihirang dessert human gipaila sa usa ka Japanese confectioner sa Tokyo ang giingong pinaka-nipis nga tsokolate sa tibuok kalibutan. Ang maong produkto gipangalanan og “Corteccia” (nga nagpasabot og panit sa kahoy sa pinulongang Italian), nga gimugna sa specialty shop nga MATTE Bottega del Cioccolato.
Kini nga tsokolate duna lamang kabag-on nga 0.03 milimetro (mm)—nga giingong mas nipis pa sa buhok sa tawo o maparehas sa kanipis sa usa ka itom nga plastic garbage bag. Gi-rolyo kini aron morag sanga sa kahoy tan-awon, ug tungod sa hilabihang kanipis niini, daling matunaw ang tsokolate sa higayon nga modapat kini sa dila, nga naghatag og dinalian ug lamiang kalami sa cacao.
Aron makab-ot ang maong talagsaong porma, migamit ang kompanya og usa ka espesyal ug eksklusibong makina nga gidisenyo sulod sa usa ka tuig ug tunga uban sa tabang sa usa ka lokal nga eksperto sa makinarya. Tungod kay anaa ra man sa ilang workshop sa Azabudai Hills sa Tokyo ang maong ekipo, gipahayag sa tag-iya nga imposible kining sundogon o kopyahon sa ubang dapit sa kalibutan sa pagkakaron.