Gipasabot ni Atty. Oscar “Oca” Moreno nga ang pagpaubos sa minimum age of criminal responsibility dili angay mahimong bugtong tubag sa nagkadaghang krimen nga nalambigit ang mga menor de edad.
Sa pakighinabi sa Bombo Radyo, matud sa kanhi kongresista ug propesor sa balaod, mas angay nga tutokan sa gobyerno ang pagpalig-on sa rehabilitative ug restorative justice system nga gituyo sa Juvenile Justice and Welfare Act o RA 9344.
Sumala ni Moreno, nga bisan ipaubos pa ang edad sa criminal liability, dili gihapon kini makasulbad sa problema kon kulang ang mga programa sa rehabilitasyon, sama sa Bahay Pag-asa, skills training ug uban pang intervention programs alang sa mga kabatan-onan nga nalambigit sa krimen.
Gipasiugda usab ni Moreno nga ang pag-atiman ug paggiya sa mga kabatan-onan responsibilidad dili lamang sa gobyerno, kondili usab sa mga ginikanan, eskwelahan, lokal nga pangagamhanan ug sa tibuok komunidad.
Dugang pa ni Moreno, ang pagpanalipod ug pag-edukar sa kabataan usa ka hiniusang katungdanan sa tanang sektor sa katilingban.