Nadiskubre sa mga otoridad nga iyaan sa usa sa duha ka menor de edad nga suspek ang tag-iya sa usa sa mga armas nga gigamit sa pagpamusil sulod sa San Jose National High School sa Tacloban City kagahapong adlawa, Hunyo 22, 2026.
Gikumpirma sa kapulisan nga ang 9mm Glock pistol nga gigamit sa usa sa mga suspek opisyal nga gipanag-iya sa usa ka babayeng pulis nga nadestino sa Police Regional Office-8.
Matud pa sa mga imbestigador, iyaan kini sa 14-anyos nga suspek.
Mao usab kini ang hinungdan nganong namatikdan sa mga otoridad ang marka nga “PNP Property” sa maong armas atol sa ilang imbestigasyon.
Dugang pa niini, gikumpirma sa kapulisan nga ang babayeng pulis nga nalambigit sa kaso gitangtang na sa iyang posisyon ug gibutang ubos sa restrictive custody samtang nagpadayon ang imbestigasyon.
Ginasusi usab sa mga awtoridad kung giunsa sa menor de edad pag-angkon ang service firearm ug kon adunay nalapas nga mga polisiya sa hustong pagtipig ug pagsiguro sa armas.
Migawas usab sa social media ang mga hulagway nga nagpakita matud pa sa usa sa mga suspek uban sa maong pulis, apan wala pa opisyal nga gipadayag sa mga awtoridad ang iyang identidad samtang nagpadayon ang mas lawom nga imbestigasyon.
Kahinumduman nga upat na ka katao ang nakabsan sa kinabuhi sa maong pagpamusil samtang 15 pa ka mga biktima ang padayon nga ginatambalan sa mga ospital.
Giila ang mga suspect nga sila alyas Rod, 15 anyos, ug si alyas Nash, 14 anyos ug parehong Grade 9 students, giila sa mga awtoridad ug gilayon nga nadakpan human sa insidente.
Usa sa gitan-aw nga motibo sa pagpamusil mao ang dugay nang giingong school bullying nga nasinati sa usa sa mga suspek.
Sa pagkakaron, nagpadayon ang imbestigasyon sa kapulisan aron matino ang tanang kahimtang sa insidente, lakip ang posibleng responsibilidad sa mga nalambigit niini, samtang nagkadaghan ang mga panawagan alang sa mas hugot nga seguridad sulod sa mga eskwelahan.