Gidagsa sa mga fans gikan sa Norway ang Boston aron suportahan ang ilang nasud sa pagbalik niini sa FIFA World Cup human sa 28 ka tuig.
Nakahatag sila og kalingawan sa publiko pinaagi sa ilang talagsaong “Viking rowing” performance nga nahimong viral sa social media.
Sa usa ka video nga nakuha sa South Station, makita ang mga Norwegian supporters nga nagsul-ob og Viking helmets ug nagbitbit og mga bandera samtang naglihok nga daw nagbugsay sakay sa usa ka Viking longship ibabaw sa escalator.
Daghang netizens ang nalingaw sa maong pasundayag, bisan pa nga adunay pipila nga nagpahayag og kabalaka sa kaluwasan tungod sa mga bandera ug kapa nga posibleng masangit sa escalator.
Samtang nagpadayon ang kasadya sa World Cup, nadungagan pa ang madasigong kahimtang sa Boston sa pag-abot sa mga fans gikan sa Scotland nga nagsaulog sa ilang 1-0 nga kadaugan batok sa Haiti pinaagi sa usa ka malipayong parada paingon sa Fenway Park.