Mikunhod ang gibug-aton sa transmission charge nga gipas-an sa mga konsumidor sa ilang bayranan sa kuryente karong bulana sa Hunyo human gipaubsan sa National Grid Corporation of the Philippines (NGCP) ang singil sa transmission wheeling ug ancillary services.
Subay sa impormasyon nga gihatag sa NGCP ngadto sa Bombo Radyo Malaybalay, miusos og 9.33 porsyento ang kinatibuk-ang transmission rate alang sa billing period sa Mayo 2026, diin gikan kini sa P1.5983 kada kilowatt-hour (kWh) ngadto na lang sa P1.4492/kWh. Lakip sa mitalasok mao ang transmission wheeling rate o ang bayad sa paghatod og kuryente nga anaa na lang sa P0.5607/kWh, samtang ang ancillary services rate nga gigamit alang sa pagpabiling lig-on sa suplay sa tibuok grid, miubos sab og 10.73 porsyento ngadto sa P0.7220/kWh.
Gitataw sa pamunoan sa kompanya nga 56 sentimos kada kilowatt-hour lamang ang ilang direktang gisingil alang sa ilang serbisyo, diin ang maong kita hugot nga kontrolado ug gi-regulate sa Energy Regulatory Commission (ERC).