Subling giila sa Malakanyang ang liderato ni Acting Senate President Win Gatchalian isip maoy opisyal nga lider sa Senado sa nasud.
Nahimo ang maong pamahayag sa Palasyo isip reaksyon human gipangayo sa kampo ni Senador Alan Peter Cayetano ang usa ka “interim arrangement” o pansamantalang sistema sa pagpadagan sa Senado.
Gipunting sa kampo ni Cayetano nga kini nga lakang aron unta maprotektahan ang mga empleyado sa Senado samtang nagpadayon ang sigalot sa liderato.
Hinuon, gibarugan ni P. Castro nga walay ikatabang ang maong sugyot sa kasamtangang sitwasyon. Gipasidan-an pa ni Castro nga posibleng maulit ang nahitabo kaniadto sa House of Representatives, diin nahimong isyu ang wala dayon pagtuman ni Cayetano sa ilang term sharing agreement uban ni Congressman Lord Allan Velasco.
Sa sugyot nga “interim arrangement,” nagtinguha ang kampo ni Cayetano nga mopatuman og “dual-signatory” o “joint-certification” nga sistema.
Kini nagpasabot nga kinahanglan ang duha ka pirma alang sa pagpagawas sa pundo, mga tseke, vouchers, kontrata, ug uban pang mahinungdanong dokumento sa operasyon sa Senado ug sa Impeachment Court.
Ang maong baruganan sa Palasyo nagpakita sa ilang determinasyon nga dili na angay usbon o komplikahon ang kasamtangang liderato sa Senado aron dili kini makabalda sa trabaho sa gobyerno.