Giandam na sa kagamhanan sa Sweden ang mga prisohan alang sa mga 13 hangtud 15-anyos nga mga kabataan nga nalambigit sa gang nunot sa pagsaka sa ihap sa mga pagpamusil ug pagpabomba nga gihimo sa mga menor de edad sa miaging dekada.
\Ubos sa gisugyot nga bag-ong balaod, ipaubos ang edad sa criminal responsibility ngadto sa 13-anyos gikan sa 15-anyos, diin ang mga batan-on nga makonbikto sa seryosong krimen bilangguon na sa mga espesyal nga prisohan imbis nga ipailawom sa social care.
Sumala ni Justice Minister Gunnar Strömmer, giisip na kini nga usa ka “emergency” human gibana-bana sa kapulisan nga moabot ngadto sa 17,500 ang mga aktibong miyembro sa gang ug 50,000 ang mga kaubanan niini nga naggamit sa social media sa pag-recruit og mga batan-on—lakip na ang mga 11-anyos—aron mopahigayon og mga krimen.
Gilauman nga mosulod ang unang batch sa mga batan-ong binilanggo human sa ting-init sa mga gi-reconstruct nga pasilidad pareho sa Rosersberg prison, diin ang ilang kinabuhi sa sulod ipokus sa pag-eskwela ug pagmatngon.
Samtang giangkon ni Prison Governor Gabriel Wessman nga ang labing dako nga hagit mao ang paghatag og kahupayan ug suporta niining mga batan-on nga wala pa sukad nakapuyo layo sa ilang mga ginikanan.