Politiko sa South Africa, gilubong nga naglingkod sulod sa iyang paboritong sakyanan

Nahimong viral sa social media ang usa ka politiko gikan sa South Africa nga ginganlan si Tshekede Pisto human matuman ang iyang katapusang pangandoy nga malubong nga naglingkod sulod sa iyang paboritong Mercedes-Benz nga sakyanan.

Gibutyag sa mga taho nga espesyal kaayo alang kaniya ang maong awto gumikan simbolo kini sa iyang kalampusan ug personal nga kinabuhi.

Imbes nga tradisyunal nga lungon, ang iyang patayng lawas gipahimutang sulod sa sakyanan samtang naglingkod, sumala sa iyang gihangyo sa wala pa siya namatay.

Bisan daghan ang natingala sa talagsaong pamaagi sa iyang paglubong, daghan usab ang natandog tungod kay nagpakita kini sa iyang dakong paghatag og bili sa sakyanan isip kabahin sa iyang identidad.