Gibutyag ni Roel Silvano Sayson, usa ka faculty member sa University of Southeastern Philippines, atol sa pagkighinabi niini sa Bombo Radyo Malaybalay, ang dakong epekto sa social media ug teknolohiya sa kahimtang sa edukasyon karon.
Matod ni Sayson, ang paagi sa paggamit sa social media nakahatag og hagit sa kinatibuk-ang pamatasan sa estudyante, diin bisan gamayng kasakit o kalipay, dali kining ipost sa social media.
Sa natad sa akademya, gibutyag ni Sayson nga dunay dako nga epekto ang paggamit sa artificial intelligence sa mga estudyante, mahitungod sa kasayon sa paggamit niini, nagsalig na ang uban ug dili na aktibo sa pagtuon.
Ang maong hisgutanan naghatod og kabalaka sa pagbaton og kalidad nga edukasyon.
Samtang, ang mga magtutudlo apektado usab sa paspas nga kalambuan sa teknolohiya, hilabi na kadtong kulang sa kahibalo sa AI ug mga aplikasyon, nasayran nga dunay hagit sa pagtuki sa kaugalingong output sa mga estudyante.
Giawhag usab ni Sayson ang mga magtutudlo nga magpadayon sa pagkat-on ug pag-ila sa mga modernong teknolohiya aron mahimong mas epektibo sa pagtudlo.
Dugang pa niini, nga ang mga ginikanan ug magtudtudlo dunay dakong papel sa pagtudlo sa kabatan-onan sa hustong paggamit sa teknolohiya ug social media.