Giduso ni City Councilor Jason Chad Ayala ang posibleng pagkansela sa business permit sa PrimeWater tungod sa padayong reklamo sa mga konsumidor kalabot sa kakuwang sa serbisyo sa tubig sa pipila ka barangay sa dakbayan.
Atol sa 43rd Regular Session sa Sangguniang Panlungsod, gipahayag ni Ayala ang iyang kasuko sa giingong “selective service” sa maong kompanya. Gireklamo sa konsehal nga nagpunting lamang ang mga proyekto sa PrimeWater sa mga subdivision o “yellow, green, ug orange areas,” samtang nag-antos gihapon sa kakuwang sa suplay ang mga barangay sa Aglayan, Linabo, ug Cabangahan.
Matod ni Ayala, ang nagkadako nga investment sa PrimeWater dakong hinungdan sa kabalaka sa kagamhanan, tungod kay posible kining moburot na bayranan sa higayon nga matapos ang pre-termination sa kontrata. Gihangyo sa konsehal nga palapdan ang serbisyo sa mga dagkong barangay ug siguraduhon nga moabot sa 11 hangtod 16 ka oras ang suplay sa tubig matag adlaw.
Sa pagkakaron, nagbitay pa ang aksyon sa konseho bahin sa business permit samtang nag-ung-ong ang tubag sa PrimeWater ug MCWD sa maong hagit sa serbisyo.