Padayon ang pagbubo og investment ug mga proyekto sa PrimeWater sa dakbayan sa Malaybalay, bisan pa man kon anaa na sa proseso sa pre-termination ang ilang kontrata sa Malaybalay City Water District (MCWD).
Sa 43rd Regular Session sa Sangguniang Panlungsod, gikuwestiyon ni Councilor Jason Chad Ayala kon ngano nga gitugotan pa ang maong mga investment, sanglit ang MCWD ra gihapon ang posibleng mobayad sa maong mga nagasto kon hingpit nang maputol ang kasabutan. Matod ni Ayala, usa kini ka dakong kabalaka tungod kay ang arbitration process na ang motino sa pinal nga kantidad nga pagabayran sa water district ngadto sa kompanya.
Giklaro ni MCWD General Manager Engr. Nolito Binahon nga samtang wala pa mahuman ang legal nga proseso o ang pag-sever sa kontrata, pabilin ang operasyon ug koleksyon sa PrimeWater. Gipasabot usab ni Binahon nga lahi ang isyu sa pre-termination sa kontrata kumpara sa isyu sa Business Permit nga giduso sa lokal nga kagamhanan.
Ang maong contractual dispute dakong hinungdan sa karon nga kalibog kon unsaon paghusay ang obligasyon sa duha ka kampo, samtang nagbitay pa ang pinal nga desisyon sa arbitration ug ang posibleng take-over sa operasyon kon ugaling masuspinde ang business permit sa maong water provider.