Giklaro ni Atty. Ferdinand Topacio nga walay legal nga gahom sa Pilipinas ang arrest warrant gikan sa International Criminal Court (ICC) kon dili kini moagi sa saktong proseso sa atong kaugalingong sistema sa hustisya.
Si Topacio, kinsa maoy gitudlo nga legal counsel ni Senador Ronald “Bato” dela Rosa, niingon nga dili mahimong dakpon ang senador base lang sa mando sa langyawng korte. Gisupak niya ang mga opinyon nga nag-ingon nga dili na kinahanglan ang extradition process sa kaso sa ICC, ug gipasiugda nga kinahanglang respetuhon ang due process tungod kay kagawasan sa tawo ang nakataya.
Gipahinumdoman usab sa abogado ang gobyerno sa mga lagda sa Korte Suprema bahin sa pagtunol og mga akusado sa langyawng nasod. Matod niya, dili angay laktawan ang mga legal nga pamaagi sa Pilipinas aron lang masunod ang gusto sa ICC, ilabi na nga ang nasod duna’y kaugalingong soberanya ug aktibong mga korte.