Emosyonal nga nagpakiluoy si Senador Ronald “Bato” dela Rosa ngadto kang Presidente Bongbong Marcos nga dili unta siya ipadala sa The Hague, Netherlands, human gipagula ang arrest warrant sa International Criminal Court (ICC) batok kaniya. Matod sa senador, andam siyang moatubang sa bisan unsang kaso basta sa korte lang dinhi sa Pilipinas ug dili sa mga langyaw nasod.
Tungod sa maong sitwasyon, giangkon ni Dela Rosa nga maglisod na siya og katulog sa grabeng kabalaka ug nagkinahanglan pa og “melatonin” aron lang makapahulay. Ang maong warrant naglambigit kaniya sa mga pagpatay sa panahon sa “war on drugs” niadtong 2016 hangtod 2018.
Sa pikas bahin, daling nanalipod si Senador Robin Padilla ug miingon nga dili angay itugyan ang usa ka Pilipinong opisyal sa kamot sa langyawng korte. Gipadayga ni Padilla nga kinahanglang respetuhon ang atong kaugalingong sistema sa hustisya kaysa mosunod sa mando sa ICC.