Gibutyag ni Senador Sherwin Gatchalian nga obligasyon sa Senado ang pag-convene isip impeachment court sa higayon nga madawat niini ang Articles of Impeachment batok kang Vice President Sara Duterte.
Matud ni Gatchalian, klaro ang giingon sa Konstitusyon nga kinahanglan “forthwith” o dayon nga aksyunan sa Senado ang impeachment complaint sa dihang madawat kini gikan sa House of Representatives of the Philippines.
Ang maong pamahayag gisundan sa gilaumang botohan sa Kamara karong Lunes kon ipasa ba ngadto sa Senado ang Articles of Impeachment batok sa bise presidente, diin gikinahanglan ang labing menos 106 ka boto aron mouswag ang reklamo.
Dugang pa ni Gatchalian, posible nga ma-convene ang impeachment court sa Mayo 13 kon mapadala dayon sa Senado ang impeachment complaint sa Martes, base usab sa mga naunang pamahayag ni Vicente Sotto III.
Bisan pa niini, gipatin-aw sa Supreme Court of the Philippines nga adunay diskresyon ang Senado sa paghubad sa pulong nga “forthwith.”
Apan sumala ni Gatchalian, dili kini angay mahimong rason aron malangan ang proseso.
Dugang pa niini, importante nga matuman ang impeachment trial aron matagaan og higayon ang kampo sa prosekusyon ug depensa nga mapresentar ang ilang mga argumento ug ebidensya.
Samtang, wala usab gisirhan ni Gatchalian ang posibilidad nga adunay mga mosyon o lakang aron pugngan ang pagporma sa impeachment court, sama sa nahitabo sa miaging Kongreso.
Apan iyang gipasiugda nga ang bisan unsang maong lakang kinahanglan adunay klaro nga legal nga basehan.