Napalgan nga wala na’y kinabuhi ang usa ka 27-anyos nga lalaki sulod sa ilang panimalay sa Purok 3, Barangay Poblacion, Impasugong, Bukidnon kagahapong adlawa Mayo 9, 2026.
Base sa imbestigasyon sa Impasug-ong Municipal Police Station, usa ka kabanay sa biktima ang daling nagtaho sa ilang buhatan pasado alas-10:55 sa buntag human madiskubrihan ang maong makalilisang nga panghitabo.
Nasayran nga ang biktima ulahing nakit-an nga nakig-inom pa sa iyang higala niadtong hapon sa Mayo 8.
Pagkasunod buntag, nakit-an na lamang kini sa iyang igsoon nga nagluhod ug wala na nagaginhawa.
Human sa gihimong pagsusi sa mga otoridad sa dapit nga nahitaboan, gipahayag sa kapulisan nga walay nakitang timailhan sa “foul play” o pagpanghilabot sa laing tawo sa kamatayon niini.