Gitugutan sa International Criminal Court (ICC) Pre-Trial Chamber 1 nga lugwayan pa ang deadline sa pagsumite sa mga dokumento may kalabotan sa mga testigo sa kaso ni kanhi Pangulong Rodrigo Duterte.Sa lima ka panid nga desisyon nga may petsang Mayo 20 ug pinirmahan ni Presiding Judge Iulia Antoanella Motoc.
Gimando sa ICC sa prosekusyon nga kumpletuhon ang pagbutyag sa arrest warrant materials nga may kalabotan sa mga saksi, nga dili molapas sa Hulyo 1, subay sa hangyo sa Prosekusyon. Ang Hunyo 16 mao ang deadline sa Prosekusyon sa pagsumite sa bisan unsang aplikasyon para sa redaksiyon sa identity sa mga testigo o dili pagbutyag sa tibuok ebidensya.
Sa samang petsa, mao usab kini ang deadline sa Victims and Witnesses Unit sa pagsumite sa ilang mga obserbasyon kabahin sa maong mga aplikasyon.Ang Hunyo 20 mao ang deadline sa pagsumite sa bisan unsang mga tubag kabahin sa maong mga aplikasyon.Hulyo 1 ang gihatag nga deadline sa Prosekusyon aron makompleto ang pagbutyag sa Arrest Warrant Materials nga may kalabotan sa mga saksi nga ilang giila sa hangyo.
Kahinumduman nga niadtong Mayo 9, nagpadala ang Prosekusyon og mga bag-ong dokumento kabahin sa warrant of arrest, apan nangayo usab og bag-ong deadline aron mabutyag ang nahabiling mga materyales.Matod sa Pre-Trial Chamber, wala mosupak niini ang depensa ni kanhing Presidente Rodrigo Duterte.