Gibutyag ni Rutchelle Galia, tagpamaba sa DSWD Field Office Region 10, nga ang paglunsad ug pagpanghatag sa medical ug burial assistance sa rehiyon naka-depende sa availability sa pondo, ug ginapangusgan karon nga mahimo kining igo aron mas daghan ang matabangan hangtod sa Disyembre 2025.
Matud ni Galia, dili tanang aplikasyon matubag dayon tungod kay ang budget ginalimitahan ug ginahimo’ng angayan base sa mga pondo nga gipagawas matag quarter o semester. Tungod niini, ang DSWD dili makacover sa tanang nanginahanglan sa usa ka higayon, apan gisaad sa ahensya nga maningkamot kini nga matagaan og tabang ang kadtong mga kwalipikado ug pinaka-nanginahanglan. Gipasabot usab ni Galia nga dili kini sakop sa balaod nga bill, ug kini nga assistance usa lamang ka intervention program sa gobyerno nga gitumong aron mutubag sa emerhensya ug pagka-dinalian nga panginahanglan sa katawhan.
Bisan pa man sa mga limitasyon, gipaninguha sa DSWD Region 10 nga mapadayon ang serbisyo, ug gipaabot nga sa umaabot nga mga buwan, mas daghang aplikante ang matabangan hangtod matapos ang tuig. Gihangyo sa DSWD ang publiko nga magsabot sa proseso ug magpakita sa pasensya, ug gipasabot usab nga ang pondo ginahisgotan ug ginaprioritize base sa urgency ug severity sa kahimtang sa mga aplikante.