Gipahibalo sa Commission on Elections (COMELEC) nga iproklama na karong Lunes ang mga napili nga party-list organizations sa bag-ohay lang nahuman nga midterm elections.
Matod ni COMELEC Chair George Garcia, ang National Board of Canvassers (NBOC) maoy nagdesisyon nga ipahigayon ang proklamasyon sa mga mananaog sa alas 3 sa hapon karong adlawa.
Gipasabot usab ni Garcia nga wala nay partial proclamation nga mahitabo, ug tibuok listahan sa mga midaog nga party-list organizations ang iproklamar.
Dugang pa niini, nga magpagawas pa ang NBOC og opisyal nga resolusyon may kalabutan sa proklamasyon sa mga napiling grupo, lakip na ang ihap sa mga lingkuranan nga ilang madawat sa Kongreso.
Sa pagkakaron, dunay 63 ka lingkuranan nga gikatakda alang sa mga party-list representatives.
Apan, gisusi sa COMELEC ang posibilidad sa legal nga paagi nga magdugang og usa pa ka lingkuranan human sa hangyo sa ubang mga grupo.
Gibase ni Garcia ang pagkalkula sa formula nga gilatid sa 2009 nga desisyon sa Korte Suprema.
Base sa National Certificates of Canvass (COC) nga gipagawas sa NBOC, nag-una sa listahan ang AKBAYAN, nga gisundan sa Duterte Youth, Tingog, 4Ps, ACT-CIS, Ako Bicol, Uswag Ilonggo, Solid North, Trabaho, ug CIBAC.
Sa pikas bahin, gisuspende ang pagproklama sa COMELEC sa 2 ka mga party-list karong adlawa gumikan sa disqualification case nga gikaatubang niini diin ang usa niini ka party-list nakakuha og 3 ka pwesto sa kongreso, samtang ang laing isa pa ka partylist nakakuha og usa ka pwesto, samtang ang Akbayan, Duterte Youth ug Tingog ang nakabaton og 3 ka mga bangko sa kongreso.