Nakatingkagol na sa selda sa kapulisan ang usa ka 35-anyos nga lalaki human kini nasikop tungod sa pasangil nga pangilad pinaagi sa falsification ug ilegal nga pag-encash sa tseke nga nagkantidad og ₱70,670.03 didto sa lungsod sa Sumilao, Bukidnon, niadtong milabayng adlaw. (Abril 11, 2026.)
Base sa imbestigasyon sa Sumilao Municipal Police Station, mireklamo ang biktima—usa ka 37-anyos nga mag-uuma sa mais ug residente sa Barangay Kisolon—human niya nasayran nga ang iyang bayad nga tseke na-encash na bisan wala ang iyang kahibalo ug pagtugot.
Giingong ang suspetsado, kinsa maoy giilang person-in-charge sa pag-release sa mga tseke sa usa ka kompanya, maoy nagtago sa maong tseke ug personal nga mi-encash niini. Aron malampusong makuha ang kuwarta, gigamit sa suspetsado ang usa ka giusab o falsified driver’s license aron magpakaaron-ingnon nga siya ang tinuod nga tag-iya sa tseke.
Sa dihang nadawat ang maong reklamo, daling miresponde ang mga operatiba sa kapulisan nga miresulta sa pagkasikop sa suspetsado. Narekober gikan kaniya ang orihinal nga tseke, kopya sa giusab nga driver’s license, ug kuwarta nga mikabat sa ₱88,670.00.
Sa pagkakaron, ang suspetsado anaa na sa kustodiya sa Sumilao MPS alang sa saktong dokumentasyon. Gihan-ay na usab sa mga otoridad ang kasong Estafa through Falsification of Public/Commercial Documents nga ipasaka batok sa maong dinakpan.