Walay nakita nga dakong epekto sa presyo sa mga batakang palaliton ang gilaumang pagkunhod sa presyo sa mga produktong petrolyo.
Sumala kang Arnel de Mesa, tigpamaba sa Department of Agriculture, ang rollback sa presyo sa lana posibleng makatabang lamang sa pagpugong sa posibleng pagsaka sa presyo sa mga palaliton, apan dili kini mosangpot dayon sa pagkunhod sa presyo.
Dugang pa niini, ang padayon nga suplay sa mga imported nga produktong agrikultural maoy usa sa nagtabang sa pagpabilin nga stable ang presyo sa kamerkaduhan.
Matud pa sa ahensya, puno usab ang mga cold storage facilities nga ilang gigamit sa pagtipig sa mga suplay, hinungdan nga adunay igo nga reserba nga mahimong ipagawas kung adunay kakulang sa merkado.
Tungod niini, napugngan ang kalit nga pagsaka sa presyo sa mga batakang baligyaon. Busa, bisan pa sa pagnubo sa presyo sa petrolyo, ang kahimtangan sa suplay ug distribusyon sa pagkaon maoy mas dako nga hinungdan sa pagkontrol sa presyo sa merkado.