Gihangyo sa Department of Energy (DOE) ang Philippine Competition Commission (PCC) nga imbestigahan ang alegasyon sa posible nga sabwatan o cartelization luyo sa matag semana nga oil price adjustments.
Matud ni Energy Secretary Sharon Garin, kinahanglang sutaon kon duna ba’y nahitabong “anti-competitive behavior” sa mga kumpanya sa lana, ilabi na nga namatikdan ang dungan ug hapit managsama nga pagsaka sa presyo niini.
Gibutyag ni Garin nga andam ang DOE nga mohatag og mga datos sa PCC aron mapaspas ang imbestigasyon.
Giklaro usab sa opisysal nga ang PCC ang dunay gahom sa pag-ila kon duna ba’y paglapas sa balaod ug kinahanglan kining ipaagi sa saktong proseso.
Gipasalig ni Garin nga andam ang ahensya nga nganlan ang mga kumpanyang mapamatud-an nga nalambigit sa sabwatan sa higayon nga duna nay pinal nga desisyon gikan sa korte o sa hingtungdan nga ahensya.