Gipasalig sa Land Transportation Franchising and Regulatory Board (LTFRB) Region 10 nga himoon nila ang tanan aron masiguro nga ang tanang kwalipikadong drayber ug operator malakip sa listahan sa mga benepisyaryo alang sa mga programa sa gobyerno.
Sumala ni LTFRB-10 Regional Director Alexes Joseph “Aljo” Bendijo, niabot na sa gibana-banaang 11,909 ka mga benepisyaryo ang malampusong na-validate sa tibuok rehiyon hangtod karon.
Apan gipasabot sa direktor nga dili pa kini ang pinal nga ihap sanglit padayon pa ang ilang gihimong validation ug pag-update sa listahan.
Matud sa direktor, gipaningkamutan sa ilang buhatan nga mapu-apod ngadto sa tanan ang pondo alang sa fuel subsidy sa rehiyon.
Giklaro sa (LTFRB) Region 10 nga dili lang mga Public Utility Jeepneys (PUJ) ang makadawat sa maong tabang, apan lakip usab ang mga bus, taxi, UV Express, TNVS, ug bisan ang mga school transport. Sumala sa datus sa ahensya, niadtong Abril 1, moabot na sa 80% sa national allocation ang malampusong na-disburse sa tibuok Region 10 diin kini gibana-banaang nagkantidad og kapin sa 69.3 million pesos.
Kahinumduman usanb nga niadtong Abril 8, mikabat sa 596 ka mga tricycle drivers ang nakadawat og cash relief sa DSWD nga nagkatindad og P5,000.00.
Dugang pa sa direktor, nga ang maong direktiba nagsubay sa mando ni Presidente Ferdinand Marcos Jr., nga siguruon nga ang tanang benepisyarno madadawat sa maong ayuda.