Upat (4) ka insidente sa pagkalumos ang natala sa Northern Mindanao nga mikalas sa kinabuhi sa upat ka indibidwal, lakip ang duha ka menor de edad, atol sa pag-obserbar sa Semana Santa. Kini sumala sa taho sa Police Regional Office 10 (PRO-10).
Sumala ni PMAJ. Joann Navarro, tigpamaba sa PRO-10, nahitabo ang usa sa mga insidente sa Kibawe, Bukidnon diin usa ka menor de edad ang namatay human malumos sa usa ka swimming pool samtang nagbakasyon uban sa iyang pamilya.
Samtang sa Barangay Pinggalot, Opol, Misamis Oriental, usa usab ka hamtong nga lalaki ang nakit-an nga wala na’y kinabuhi niadtong Abril 3 subay sa pagsaulog sa Good Friday, ug gituohang nalumos sa usa ka suba o sapa.
Sa laing bahin, duha pa ka kaso sa susamang insidente, diin lakip ang usa pa ka menor de edad ang natalang namatay sa ubang bahin sa rehiyon.
Dugang pa sa opisyal, nagpadayon ang mga trahedya hangtod sa pagsaulog sa Easter Sunday. Sumala sa report sa Cagayan de Oro City Police Office (COCPO), adunay insidente sa pagkalunod o pagkalumos usab sa usa ka sapa sa Villa Angela, Balulang, Cagayan de Oro City diin usa ka menor de edad ang namatay.
Gawas niini, nakadawat usab ang mga otoridad og report mahitungod sa laing insidente sa sa Barangay Dampil, Lagonglong, Misamis Oriental, diin ang biktima usa ka hamtong nga lalaki samtang nagmaneho og jetski ug nadisgrasya hinungdan sa iyang hinanaling kamatayon.