Gipanghimakak sa Malacañang ang nagkaylap sa social media nga alegasyon nga magsugod ang “energy lockdown” sa Abril 20.
Sumala ni Palace Press Officer Claire Castro, fake news ang maong alegasyon.
Misunod ang pamahayag human mikaylap ang usa ka social media post nga nag-awhag sa publiko nga mangandam alang sa giingong lockdown pinaagi sa andam og power bank, solar equipment, rechargeable fan, flashlight, kandila, suga, pagkaon, tambal ug tubig.
Matud sa Malacañang nga walay ipatuman nga energy lockdown samtang padayon ang gobyerno sa pagsiguro og alternatibong tinubdan sa fuel taliwala sa tensyon sa Middle East.
Kahimumduman, nga nagdeklara si Presidente Ferdinand Marcos Jr. og usa ka tuig nga state of national energy emergency aron atubangon ang posibleng kakulang sa suplay sa fuel ug mapalig-on ang sektor sa enerhiya.
Aron maminusan ang epekto sa pagsaka sa presyo sa lana, palapdan sa gobyerno ang fuel subsidy program alang sa transport sector sa tibuok nasud sugod Abril 6.