Ipatuman sa mga komunidad ang Enhanced Curfew Hours alang sa mga kabatan-onan nga nag-edad og 18 anyos paubos.
Kini ang gibutyan ni Department of Interior and Local Government (DILG) Secretary Juanito Victor ‘Jonvic’ Remulla atol sa press conference karung adlawa.
Tumong niini nga malikayan ang mga “gang-gang” sa kabatan-onan nga maoy hinungdan sa kasamok sa kadalanan ug aron masiguro nga luwas nga makapauli ang mga batan-on sa ilang tagsa-tagsa ka panimalay.
Hugot usab nga gidili ang pag-inom og ilimnong makahubog sa mga dalan o daplin sa kalsada tungod kay kini ang nag-unang rason sa panag-away lakip na ang sexual harassment batok sa kababayen-an.
Sa laing bahin, gibutyag ni Remulla nga wala problema kung ang pag-inom ginahimo sulod sa mga panimalay ug dili himuon sa mga pampublikong lugar.