Naigo sa iyang papangig ang usa ka 30-anyos nga lalaki human kini gitigbas sa usa ka 65-anyos nga suspek sulod sa usa ka bilyaran sa Purok 1, Sitio Ilignan, Brgy. Guihian, Impasugong, Bukidnon, pasado alas-4:00 sa hapon niadtong Abril 2, 2026.
Base sa inisyal nga imbestigasyon sa kapulisan, naglalis ang biktima ug ang suspek kinsa parehong residente sa Sagpang, Brgy. Maluko, Manolo Fortich. Sa tunga-tunga sa ilang panagbangi, giingong gisumbag sa biktima ang suspek sa nawong.
Tungod sa maong hitabo, miadto ang suspek sa iyang umahan ug mikuha og sanggot. Sa iyang pagbalik, iyang giatubang pag-usab ang biktima ug dihadiha kining gitigbas, diin naigo ang wala nga bahin sa ubos nga apapangig sa biktima.
Human sa insidente, gilabay sa suspek ang gigamit nga hinagiban ug daling mikagiw padulong sa wala masayring direksyon. Gilayon usab nga gipahigayon sa kapulisan ang usa ka manhunt operation aron madakpan ang maong suspetsado.
Ang biktima daling gidala sa Bukidnon Provincial Medical Center (BPMC) sa San Miguel, Manolo Fortich pinaagi sa Guihian Rescue Team. Sumala sa ulahing report, ang biktima anaa na sa luwas nga kahimtang o stable condition.
Sa pagkakaron, padayon pa ang lawom nga imbestigasyon sa otoridad aron masuta ang hingpit nga motibo ug mapahigayon ang saktong kaso batok sa suspek.