Gibasura sa Supreme court ang petisyon ni Atty. Herminio ‘Harry’ Roque nga gi-file batok sa House of Representatives Quad Committee.
Tumong sa maong petisyon sa abogado mao ang pagpugong sa komite nga i-arestoh kini ug i-obliga sa mga pagdungog, lakip usab nga ipasumite ang mga dokumento sa imbestigasyon bahin sa Philippine Offshore Gaming Operators (POGO).
Sumala sa desisyon nga gisulat ni Associate Justice Samuel Gaerlan, giisip sa Supreme Court En Banc nga ‘moot’ ang Petition for Certiorari and Prohibition human gisaka sa QuadComm ang ‘contempt order’ batok kaniya sa pagtapos sa 19th Congress niadtong Hunyo 2025.
Kahinumduman, nga giimbitahan sa QuadComm si Atty. Roque sa unang pagdungog isip ‘resource person’ apan wala kini mitubag tungod sa giingong pag-usab sa iskedyul.
Nisalmot kini sa ikaduhang pagdungog, diin gikwestyon ang iyang kalambigitan sa operasyon sa POGO ug gimanduan nga moapil sa sunod nga pagdungog dala ang pipila ka dokumento.
Wala kini gisunod ni Roque ug nisumite siya og motion to quash subpoena, apan gisalikway kini sa komite.
Gi-isyuhan si Roque og show cause order aron depensahan ang kaugalingon ug malikayan ang contempt. Sa sunod nga pagdungog, wala mitambong si Roque, hinungdan sa pagpaguwa og subpoena batok kaniya.
Ang kanhing opisyal niduso sa Korte Suprema ang iyang reklamo kauban ang hangyo alang sa writ of amparo batok sa contempt ug detention orders sa kamara.
Apan gisalikway sa Korte Suprema ang partikular nga hangyo alang sa amparo, gumikan dili kini angay nga remedyo batok sa maong kamanduan sa kongreso.
Sa milabay nga panahon, pinaagi sa bag-ong resolusyon sa Supreme Court, gipamatud-an na nga gibasura ang petisyon ni Atty. Harry Roque.