Gipahugtan karon sa Provincial Task Force ang pagmonitor sa suplay sa lana human makumpirma nga 19 ka gasolinahan sa lalawigan ang temporaryong nagsira tungod sa kakuwang sa fuel deliveries sa tibuok Mindanao.
Sumala ni Board Member Atty. Oliver Owen Garcia, nakita sa ilang tigom uban sa Department of Energy (DOE) nga nakatutok lang sa Luzon ang maong suplay ug walay klarong datos alang sa Mindanao. Tungod niini, gimando ni Gobernador Rogelio Neil Roque sa PNP ang pag-inspeksyon sa tanang gasolinahan ug ang dinaliang pag-assess sa fuel reserve sa probinsya.
Sa pagkakaron, ang Provincial Motorpool duna na lang may 12,000 litros nga reserba sa diesel. Isip paagi sa pagdaginot, gipahunong una ang pipila ka mga proyekto ug gipapabalik ang mga heavy equipment. Gilauman nga mas maapektuhan ang suplay sa katapusan sa Abril kon dili pa mabalik ang normal nga deliveries.
Samtang sa bahin sa transportasyon, misaka na sa ₱13 ang plete sa motorela sa Malaybalay. Apan, giklaro sa LTO nga wala pa’y opisyal nga fare increase sa mga bus ug multicab tungod kay gipugngan pa kini sa nasudnong kagamhanan.Gipaniguro usab sa probinsya nga duna’y igong reserba sa lana ang mga ospital alang sa ilang mga generator sets aron dili mabalda ang serbisyo sa mga pasyente panahon sa brownout o load shedding. Kini nga mga contingency measures gipatuman aron masiguro nga magpadayon ang operasyon sa gobyerno ug disaster response taliwala sa hulga sa krisis sa lana.