Padayon gihapon ang operasyon sa pipila ka mga pamasaherong sakyanan sa dakbayan sa Malaybalay taliwala sa obserbasyon sa Kuwaresma karong tuiga.
Sa pakighinabi sa Bombo Radyo Malaybalay ngadto sa pipila ka mga drayber, ang pagpadayon sa pagbiyahe nagsumikad sa dinalian nga panginahanglan sa panalapi.
Matud pa ni Brelle John Cantos usa ka driver nga gikinahanglan gihapon ang mokita og kwarta bisan sa panahon sa Kuwaresma aron matubag ang adlaw-adlaw nga galastuson sa ilang pamilya.
Dugang pa ni Cantos, dili makanunayon ang kita sa maong panginabuhian diin adunay mga adlaw nga gamay ra ang kita labi na kung mingaw ang pasahero subay usab sa taas nga presyo sa gasolina
Sa laing bahin gipaambit ni Rey Billones usa ka dispatcher sa Malybalay City terminal nga kumpara sa niaging tuig gamay ra usab ang pasahero sa pagkakaron tungod usab sa padayon nga krisis nga ginatubang sa nasud.
Samtang ang uban nga pamasaherong bus tulo na lamang ang mga benefeciary lakip na niini ang mga estudyante, senior citizen, ug PDWs.