Miangat sa ikatulong puwesto sa tibuok Pilipinas ang Northern Mindanao sa pinakadaghang nadakpang colorum nga mga drayber ug sakyanan, sumala sa taho sa Land Transportation Office (LTO)-X.
Sa pakighinabi sa Bombo Radyo Malaybalay kang Regional Director Nelson S. Manaloto sa Land Transportation Office-X, gibutyag niini nga mas gipahugot pa nila ang kampanya batok sa mga ilegal nga sakyanan niining Oplan Semana Santa aron masiguro ang kaluwasan sa mga sumasakay nga mopauli sa ilang tagsa-tagsa ka mga probinsya.
Ingon man, gihisgutan sa opisyal nga daghan usab ang nasikop sa lalawigan sa Bukidnon, partikular na sa mga dakbayan sa Malaybalay ug Valencia, pinaagi sa gipahigayon nga roadside inspections ug terminal monitoring.
Gipasabot ni Manaloto nga peligroso alang sa publiko ang pagsakay sa mga colorum tungod kay wala kini’y prangkisa ug walay makuha nga tabang o insurance ang pasahero kon simbako malambigit sa aksidente. Tungod niini, muling nakiusap ang LTO sa mga operator nga dili na pagawson ang mga sakyanang walay prangkisa, ug sa baylo, mokuha og special permit sa LTFRB aron legal nga makabiyahe niining Semana Santa.
Bisan pa man sa gipatuman nga half-day work arrangement niining Miyerkules, gipaniguro sa LTO-10 nga magpabiling aktibo ang tanang law enforcers sa Northern Mindanao hangtod sa pagtapos sa Semana Santa aron masiguro ang hapsay, luwas, ug malinawon nga biyahe sa publiko.