Sikop ang tulo ka mga indibidwal, lakip ang usa ka magtiayon, human masapon sa akto nga nangawat og mga prutas sa usa ka fruit stand sa Barangay Aglayan, Malaybalay City, Bukidnon kaganihang kadlawon.
Ang mga dinakpan giila nga usa ka lalaki nga hingkod na ang pangidaron kauban ang iyang asawa, kinsa pulos mga residente sa Barangay 9 sa maong siyudad, ug laing usa ka lalaki nga kauban usab sa mga suspek.
Sumala sa report, sakay sa usa ka pick-up truck ang mga suspek sa dihang gihimo ang krimen. Kahinumdoman nga kini nga mga indibidwal mao usab ang nakit-an sa CCTV kaniadtong miaging tuig nga nangawat og uling sa Valencia City, apan wala sila mapasakai og kaso niadtong higayona.
Sa kasamtangan, balhog na sa prisuhan sa Malaybalay City Police Station ang mga suspek ug andam nang pasakahan og tukmang kasong pagpangawat.