Narekober sa tropa sa 89th Infantry (Makatao) Battalion ubos sa pagpangulo ni Lieutenant Colonel Antonio G. Bulao ang nagkalain-laing armas ug war materials atol sa intelligence-driven operation niadtong Marso 27, 2026 sa mga barangay sa Kipaypayon ug Mahayag, Quezon, Bukidnon.
Lakip sa narekober ang duha ka M79 grenade launcher, duha ka KG9 submachine gun, tulo ka improvised shotgun, usa ka pistola-type shotgun, usa ka caliber .45 pistol, upat ka .357 revolver, usa ka .38 revolver, usa ka .38 pistol-type firearm ug usa ka .22 caliber pistol.
Nakuha usab sa lugar ang duha ka improvised explosive device (IEDs), usa ka hand grenade, duha ka unserviceable nga Baofeng radios, subersibong dokumento, daghang bala ug lain-laing parte sa armas.
Ang tanang narekober nga mga butang luwas nga gi-secure ug gidala sa unit headquarters alang sa hustong safekeeping.
Nagmalampuson ang operasyon tungod usab sa kooperasyon sa mga lokal nga residente nga naghatag og kasayuran.