Namatikdan ang pagsaka sa presyo sa pipila ka mga nag-unang sagol sa binignit sa publikong merkado sa dakbayan sa Malaybalay samtang nagkaduol ang Semana Santa. Kini dungan usab sa hagit sa nagkataas nga gasto sa transportasyon nga giatubang sa mga mamalitay ug biyahidor.
Sumala ni “Alyas Nora,” usa ka magpapatigayon sa merkado, duna’y pagsaka sa presyo sa mga pang-binignit sama sa gabi nga anaa na sa ₱60 hangtod ₱70 kada kilo, samtang ang asukar misaka usab sa ₱70 kada kilo. Gibutyag niya nga ang ilang suplay kasagarang gikan sa mga kabukiran sa Bukidnon sama sa Dalwangan ug Liberty. Gilauman nga mosaka pa ang gidaghanon sa mga mamalitay sa Huwebes ug Biyernes Santo, bisan pa man sa iyang obserbasyon nga medyo nihinay ang halin karong tuiga tungod sa krisis sa ekonomiya.
Dili lang ang mga palaliton ang misaka, apan lakip na usab ang gasto sa pagbiyahe. Sumala ni “Alyas Gloria,” usa ka biyahidor paingon sa dakbayan sa Cagayan de Oro, dako ang epekto sa padayon nga pagsaka sa presyo sa lana. Tungod niini, napugos siya nga mag-commute na lamang imbes gamiton ang kaugalingong sakyanan aron makadaginot, sanglit halos doble na ang gasto sa gasolina kumpara kaniadto tungod sa matag semana nga paglihok sa presyo niini.
Sa kinatibuk-an, makita nga samtang nangandam ang katawhan sa espiritwal nga kasaulogan sa Semana Santa, dako usab ang ilang paningkamot sa pagdumala sa ilang panalapi taliwala sa nagkataas nga presyo sa mga palaliton ug transportasyon.