Nasakmit ang bag-ong rekord sa usa ka lalaking food lover human kini makakaon sa 28 ka Michelin star restaurants sa New York sulod lamang sa 24 oras.
Ang taga-Las Vegas nga si Joshua Fyksen nagsugod sa iyang food journey sa Oxomoco sa Brooklyn niadtong Mayo 9, 2025, ug nahuman kini pagkasunod adlaw sa Gramercy Tavern sa Manhattan.
Una nang gibuak ni Fyksen ang unang record alang sa ‘Most Michelin-starred restaurants visited in 24-hours’ niadtong 2023, human siya nakakaon sa 22 ka mga New York eateries sa oras nga gigahin alang kaniya.
Apan na-ilog kini kaniya niadtong 2024 sa duha ka Indian food enthusiasts nga sila Sujoy Kumar Mitra ug Rajnish Kumar Tripathi nga nakaabot og 25 ka Michelin-star restaurants sa Hong Kong.
Tungod niini, mibalik si Fyksen sa New York aron mabawi ang titulo.
Matud pa ni Fyksen, dili na niini maihap ang tanan niyang nagasto lakip ang biyahe, apan sa pagkaon pa lang mikabat na kini og $976.97, gawas pa sa tips ug transportasyon nga miabot og $474.37.