Mokabat sa kapin 8 milyon ka mga indibidwal ang nagpahigayon og protesta sa nagkadaiyang bahin sa US nga gitawag og “No Kings” protest aron kontrahon ang mga polisiya ni Presidente Donald Trump.
Lakip sa mga mulo sa mga raliyesta mao ang tensyon sa giyera sa Iran, ang pagpahugot sa immigration, ug ang walay hunong nga pagsaka sa presyo sa mga palitonon.
Ang maong lihok nahitabo sa mga dagkong dapit sama sa Los Angeles, Boston, New York, Washington DC, ug Houston.
Samtang sa Minnesota, gihandom usab ang mga biktima nga si Renee Nicole Good ug Alex Pretti nga gipusil sa mga federal immigration agents.
Ningsalmot usab sa maong kalihokan ang mga iladong personalidad sama ni actor Robert De Niro ug singer Bruce Springsteen.
Samtang nagpadayon ang protesta, nahimong estrikto ang mga otoridad ug aduna pipila nga gipangdakop sa Los Angeles tungod sa pagsukol sa mga pulis.