Gipahinumdoman ang publiko nga ang tinuod nga kaluwasan dili makuha pinaagi sa penitensya kondili gikan lamang sa Ginoo, dungan sa pagsugod sa Semana Santa niining Dominggo sa Palm Sunday. Sa pakighinabi sa Bombo Radyo Malaybalay, atol sa programang Goodmorning Philippines kay Cleb B. Calimutan, ang presidente sa Confraternity of the New Apologetics, ang penitensya usa lamang ka paagi sa pag-andam sa kaugalingon aron madawat ang grasya sa kaluwasan.
Gipatin-aw ni Calimutan nga ang pagpenitinsya gihimo isip pagpakita sa gugma ngadto sa Labaw’ng Makagagahum pinaagi sa paglikay sa mga kalibutanong tinguha ug pagtutok sa espiritwal nga kinabuhi. Dugang pa niya, ang Palm Sunday nagtimaan sa madaugong pagsulod ni Hesukristo sa Jerusalem diin gitagbo siya sa katawhan pinaagi sa mga lukay. Kini nagsimbolo sa pagdawat sa usa ka hari nga nagdala og kalinaw ug dili gubat.
Dinhi sa Pilipinas, lukay sa lubi ang naandan nga gigamit nga ginabenditahan ug ginaprosisyon padulong sa simbahan isip paghandum sa maong balaang hitabo. Matud ni Calimutan, kini naglarawan usab sa umaabot nga kaluwasan diin ang mga linuwas magdala og palmera padulong sa gingharian sa langit, sumala sa gihulagway sa Bibliya.
Sa kinatibuk-an, gipasiugda sa opisyal nga ang tinuod nga mensahe niining adlawa mao ang kadaugan batok sa sala ug kamatayon, ug ang pag-andam sa espiritwal nga aspeto sa matag Kristiyano.