Gikondena sa Philippine National Police (PNP) ang nahitabong pag-ambush sa mga tropa niini didto sa Shariff Aguak, Maguindanao del Sur, kagahapon sa gabii, Marso 28, 2026.
Ang maong pagpangatake miresulta sa kamatayon sa lima ka pulis, samtang tulo pa ang samaran.
Giatake sa wala pa mailhing mga armadong suspek ang mga miyembro sa 2nd Provincial Mobile Force Company samtang pauli na unta kini sa detachment human sa gihimong patrol ug police visibility operations.
Matud sa PNP, kini nga binuhatan usa ka direktang pag-atake sa balaod ug hulga sa kalinaw ug kahan-awan.
Matud pa ni PNP Chief Jose Melencio Nartatez Jr., gilusad na sa ahensya ang hot pursuit operations uban ang Armed Forces of the Philippines (AFP) aron mailhan ug madakpan ang mga responsable sa krimen.
Gipasalig sa PNP nga himoon ang tanang gikinahanglang lakang aron makab-ot ang hustisya alang sa pamilya sa mga biktima.
Nipadayag usab ang kapulisan sa ilang pahasubo ngadto sa mga kabanay sa mga nangamatay, kinsa gihulagway nga mga indibidwal nga nagpakita og kaisog ug dedikasyon sa ilang katungdanan.
Sa pagkakaron, nagpadayon pa ang operasyon sa maong dapit samtang gipalig-on ang seguridad sa Shariff Aguak ug sa mga silingang komunidad.