Miubos og 24 porsyento ang crime rate sa Region 10 base sa pinakabag-ong monitoring sa Police Regional Office 10, nga nagpakita sa positibong epekto sa gipahigayon nga mga operasyon batok sa kriminalidad.
Sa pakighinabi sa Bombo Radyo Malaybalay kay PMaj. Joann G. Navarro, tigpamaba sa Police Regional Office 10, na matod pa ang datos gikompara sa bulan sa Pebrero karong tuig ug sa miaging tuig, samtang padayon pang gisusi ang kahimtang sa Marso aron mahibal-an kung magpadayon ba ang pag-ubos o adunay pagtaas.
Bisan pa niini, gipasiugda nga ang tumong sa kapulisan mao ang pagpugong sa krimen ug pagsulbad dayon sa mga insidente nga mahitabo. Gi-awhag usab ang publiko nga dayong moreport sa kapulisan sa bisan unsang kahimtang aron mapalig-on ang crime prevention ug solosyon.
Samtang nagkaduol ang Semana Santa, giagda ang katawhan nga magpabiling alerto ug makigtinabangay pinaagi sa pagreport sa mga kadudahang lihok, armado nga indibidwal, ug nabyaan nga mga butang, samtang gihangyo usab nga gamiton ang police hotlines o 911 sa mga emerhensiya aron mapadayon ang kalinaw sa rehiyon.