Nagpahayag og pasalamat ug paglaum si Atty. Eddie Cuaresma, kanhi presidente sa Integrated Bar of the Philippines (IBP), sa resulta sa pinakabag-ong eleksyon sa Senado human makasulod ang mga senador nga may konkretong programa alang sa katawhan, ilabi na sa sektor sa edukasyon ug agrikultura. Gibutyag ni Atty. Cuaresma nga positibo siyang nasurpresa sa pagkadaug nila Bam Aquino ug Kiko Pangilinan, nga nailhan sa ilang mga adbokasiya nga tinuod nga may kalabutan sa panginahanglan sa masa.
Sulti ni Atty. Cuaresma, si Bam Aquino maoy nagmugna sa Free Tertiary Education law, ug si Kiko Pangilinan aktibong nanalipod sa mga mag-uuma, ang ilang pagkadaug nagpakita nga ang kabatan-onang botante, o ang Generation Z, nakamatngon na sa tinuod nga isyu. Giklaro niya nga kung wala ang pagmatngon nga pagpili sa Gen Z, posibleng ang Senado mapuno sa mga personalidad nga gikan sa political dynasties ug entertainment industry, nga usahay kulang sa tin-aw nga plataporma o tinuod nga representasyon sa masa.
Dugang pa ni Cuaresma, nagkagamay ang tinuod nga murepresentar sa katawhan sa Senado karon, kung dili molihok ang kabatan-onan, basin pulos na lang popularidad ug apelyido ang basehan sa Senado. Gidayeg niya ang kabatan-onan nga nag-research sa mga kandidato ug mipili base sa plataporma, dili lang sa dungog, ug gila kini nga senyales sa paglambo sa political maturity sa mga bag-ong botante.
Pamahayag pa ni Atty. Cuaresma, nga adunay sagol pagpakatawa ug paglaum, ang Generation Z karon dili na lang pa-cute o pa-trending, aduna na silay panglantaw sa ilang kaugmaon, sa edukasyon, sa pagkaon, ug sa trabaho. Kini ang klase nga kabatan-onan nga makaluwas sa Senado sa pagka-komedya. Sa tumoy sa iyang panawagan, gi-awhag ni Atty. Cuaresma ang tanang botante — batan-on man o hamtong — nga magpadayon sa pagpili sa mga lider nga adunay kasingkasing ug plataporma para sa katawhan, dili lang sa dungog, apelyido, o kasikatan.